Եւրոպայի Խորհուրդի Խորհրդարանական Վեհաժողովի (Ե.Խ.Խ.Վ.) հայաստանեան պատուիրակութիւնը ունի յստակ ռազմավարութիւն եւ հնարաւորինս պատրաստուած է յառաջիկայ ձմեռնային նստաշրջանի օրակարգին մէջ ընդգրկուած հակահայկական զեկոյցներուն հակահարուած տալու:
Այս մասին, ըստ Armenpress.amի, ըսած է Ե.Խ.Խ.Վ. հայաստանեան պատուիրակութեան անդամ,Հայաստանի Հանրապետական կուսակցութեան Ա.Ժ. խմբակցութեան պատգամաւոր Նայիրա Կարապետեան: «Մենք մշակել ենք եւ ունենք յստակ մարտավարութիւն, սակայն ներկայ պահին չեմ կարող հրապարակել մեր քայլերը: Դա սխալ կը լինի: Ես լիայոյս եմ, որ մենք կը կարողանանք դրական արդիւնքի հասնել»,- ըսած է պատգամաւորը:
Անդրադառնալով Ե.Խ.Խ.Վ. ձմեռնային նստաշրջանի օրակարգի երկու հակահայկական բանաձեւերուն դէմ կազմակերպուած համացանցային ստորագրահաւաքին, որ կազմակերպած է Հայ Դատի Եւրոպայի Գրասենեակը` Նայիրա Կարապետեան նշած է, որ նստաշըրջանի ընթացքին հայկական պատուիրակութեան անդամները պիտի բարձրաձայնեն անոր արդիւնքներուն մասին: «Ես վստահ եմ, որ մինչեւ Յունուարի 25ը, երբ կը մեկնարկի ձմեռային նստաշրջանը, այդ ստորագրահաւաքին շատ մարդիկ միացած կը լինեն: Դա կը գայ ապացուցելու այն հանգամանքը, որ մենք պատուիրակուած ենք խօսելու ոչ միայն Հայաստանի Հանրապետութեան, այլ ողջ հայութեան անունից: Դա պէտք է, որ դրական արդիւնք տայ»,- ընդգծած է Նայիրա Կարապետեան:
Ե.Խ.Խ.Վ. ձմեռնային նստաշըրջանը պիտի մեկնարկէ Յունուար 25ին: Նստաշրջանի օրակարգին մէջ ընդգրկուած են հակահայկական երկու զեկոյցներ: Զեկոյցներէն մէկը, որուն հեղինակն է բրիտանացի պատգամաւոր Ռոպերթ Ուոլթըր, կը կրէ «Բռնութիւններու աճը Լեռնային Ղարաբաղի եւ Ատրպէյճանի այլ գրաւուած տարածքներու մէջ» անուանումը: Երկրորդ զեկոյցը կը վերաբերի Սարսանկի ջրամբարին եւ կը կրէ «Ատրպէյճանի սահմանամերձ շրջաններու բնակչութիւնը միտումնաւոր զրկուած է ջուրէ» խորագիրը: Զեկոյցին հեղինակը պոսնիացի պատգամաւոր Միլիցա Մարգովիչն է: Հայ Դատի Եւրոպայի Գրասենեակի կազմակերպած ստորագրահաւաքին արդէն միացած է 1012 մարդ: