Print
Category: «Ազատ Օր»ի նիւթերէն՝ 50 տարի առաջ

- Փարիզեան բեմերու վրայ գնահատուած ֆրանսահայ դերասան Կրեկուար Ասլան (Գրիգոր Ասլանեան) 1963էն ի վեր իր գեղարուեստական գործունէութիւնը առաւելապէս կեդրոնացուցած է շարժանկարի աշխարհին մէջ: Հռչակաւոր աստղերու հետ Ասլան դարձուցած է բազմաթիւ ժապաւէններ: 1964ին Ասլան Լոնտոնի մէջ փայլուն յաջողութեամբ խաղացած է «Էմէ՞ վու լէ ֆամ» եւ «Տը ելօ Ռոլզ Ռոյզ» ժապաւէններուն մէջ՝ իբրեւ խաղընկեր ունենալով Ժան Մորոն ու Ռեքս Հարրիսընը: Փարիզահայ արուեստագէտը, դարձեալ Լոնտոնի մէջ կարեւոր դեր ստանձնած է «Տը պրայթ սան» եւ «Տը Մէյն Ճանս» ժապաւէններուն մէջ: Առաջին ժապաւէնին մէջ իր խաղընկերը եղած է տիկ. Պոկարթը: Իսկ Փարիզի մէջ Ասլան շատ յաջող դեր մը ստանձնած է «Լէ կարիլ» եւ Պելկրատի մէջ՝ «Մարքօ Փոլօ» ժապաւէններուն մէջ: 1965ին հայազգի արուեստագէտը, Հոլիվուտ հրաւիրուելով, Ճոն Սիպերկի հետ խաղացած է «Մոմենթ թու մոմենթ»ի եւ Մատրիտի մէջ՝ Անթոնի Քուինի, Ալեն Տըլոնի եւ Քլոտիա Քարտինալէի հետ՝ «Տը սենթուրիա» նշանաւոր ժապաւէնին մէջ: Տաղանդաւոր հայ արուեստագէտը Լիզպոնի եւ Հռոմի մէջ Մելինա Մերքուրիի, Սանթրա Տիի եւ Թոնի Ֆրանչիոզայի հետ իր փայլուն մասնակցութիւնը բերած է «Է մեն քուտ կեթ քիլտ» ժապաւէնին:

- Երգիչ Միքայէլ Քըրմոյեան իշխան Պունիսի դերը ստանձնեց Ճորճ Էպըթի «Անէա» օփերային մէջ: Մեթրոփոլիթըն օփերայի աստղ Ճորճ Լանտըն կþերգէր ցարդ իշխան Պունինի դերը, սակայն անակնկալ հիւանդութեան մը պատճառով շրջանի մը համար քաշուիլ հարկադրուեցաւ երաժշտական ասպարէզէ: Ճորճ Էպըթ մեծ երգիչին յարմարագոյն փոխանորդը նկատեց Միքայէլ Քըրմոյեանը: Քըրմոյեան հանրածանօթ է արդէն օփերայի շրջանակներուն: Լոս Անճելըսի օփերայի պասերէն է եւ Մեթրոփոլիթըն օփերայի սթիւտիոյին մէջ ալ յաճախ երգեց ան «Սեւիլեան սափրիչ»ի, «Ֆաուսթ»ի եւ «Մոգական սրինգ»ի երգերը: