Print
Category: «Ազատ Օր»ի նիւթերէն՝ 50 տարի առաջ

- Պուէնոս Այրէսի «Գլարին» օրաթերթը կը գրէ.¬ «Օր մը եւ հինգ ձայներ», այս է բանաստեղծութիւններու անդրանիկ հատորը երիտասարդ քերթողուհիի մը՝ Ալիսիա Կիրակոսեանի, որուն գիրքը նկարազարդուած է անուանի նկարիչներ՝ Տեմեթրիօ Ուրրուչուայի, Շարիօ Կրանտիի, Ալպերթօ Պրուսոնէի եւ Էնրիքօ Փոլիքասթրոյի կողմէ։ Գրական այս երկը հանրութեան կը ներկայացուի ծանօթ գրող Ուլիսէս Փեթիթ տը Մուրաթի կողմէ։

- Արժանթինի Գորտոպա քաղաքի Ազգային Վարչութեան ատենապետ տոքթ. Եղիա Պոյաճեան, որ կը պաշտօնավարէր համալսարանի տնտեսագիտական ճիւղի իբրեւ քարտուղար, կրթական այդ բարձրագոյն հաստատութեան վարիչ նշանակուած է։ Գորտոպահայ գաղութը կը բաղկանայ երեք հազար հոգիէ։ Կան՝ աւելի քան երեսուն համալսարանաւարտ մասնագէտներ եւ մօտաւորապէս նոյնքան բարձրագոյն ուսմանց հետեւող ուսանողներ։ Համալսարանի զանազան մասնագիտական բաժիններուն մէջ կան չորս հայ օգնական ուսուցիչներ։ Գասպարեան օգնական¬ուսուցիչ է բժշկական ուսումնարանին, Վարդուհի Խուպէսեան՝ ատամնաբուժական ճիւղին, Երամեան՝ ճարտարապետական ուսումնարանին եւ տոքթ. Եղիա Պոյաճեան, տնտեսագիտական ճիւղին մէջ։

- Մ.Ա.Կ.ի Քաղաքական Յանձնախումբը, 91 քուէով վաւերացուց բանաձեւ մը, որով կը պահանջուի, որ զինաթափութեան համաշխարհային խորհրդաժողով մը գումարուի, ամէնէն ուշը մինչեւ 1967։ Բանաձեւին ի նպաստ քուէարկեցին նաեւ Միացեալ Նահանգները, Խորհրդային Միութիւնը եւ Մեծն Բրիտանիա։ Ֆրանսա եւ Ազգայնական Չինաստան ձեռնապահ մնացին։ Բանաձեւին մէջ կþըսուի՝ թէ բոլոր երկիրները պիտի հրաւիրուին մասնակցելու այս խորհրդաժողովին։ Այնպէս որ համայնավար Չինաստանի առջեւ ալ դուռը բաց պիտի ըլլայ։ Կը կարծուի՝ թէ Մ.Ա.Կ.ի Ընդհ. Ժողովը պիտի վաւերացնէ այս բանաձեւը, որ առաջարկուեցաւ ափրիկեւասիական երկիրներու խմբակին կողմէ։